Este ano preparamos con moito mimo unha gala moi especial para pechar o curso 2014 – 2015.
Unha actuación na que participarán todos os compoñentes do grupo Santaia! Como non podía ser doutro xeito, eliximos a noso escenario favorito, as Torres de Santa Cruz. Alí estaremos o sábado 13 ás 19:30 h, para tentar emocionar ó publico asistente.

Sen dúbida, un broche de Ouro para un ano que deixa tras de si moitos ensaios e moitas horas de baile, gaita e percusión. Pero sobre todo, moitas anécdotas, viaxes, risas e horas compartidas, facendo o que máis nos gusta.

Convidamos a todas as persoas que o desexen a participar, de balde, neste evento que de seguro, non deixará a ninguén indiferente!

Unha actuación para todas as idades, ó igual que os máis de 50 compoñentes do grupo Santaia, que dende os 4 ós 60 anos traballan arreo por espallar o folclore tradicional galego.

Esperamos vervos a todos alí, con moitos folgos para aplaudir e gozar do que será o espectáculo do ano! Non é de perder!

Pois si, a próxima fin de semana imos visitar a Casa galega de Fuenlabrada!

 
Con motivo do día das Letras Galegas, o centro realiza a súa comida anual, e unha serie de eventos para dar a coñecer e mostrar a cultura galega en terras madrileñas. A Casa Galega de Fuenlabrada foi fundada no ano 1988, e a súa creación responde ó esforzo e iniciativa dun grupo de galegas e galegos procedentes na meirande parte dos casos da bisbarra de Ferrol , froito da reconversión naval dos anos 80.  No seu local ofrecen clases de gaita, percusión, baile… e o seu grupo de música tradicional, “Carrabouxos”, leva máis de dúas décadas espallando o folclore galego pola península.

Unha representación do grupo de baile e gaitas Santaia realizará varias actuacións e pasarrúas, os días 16 e 17 de Maio, dentro do programa elaborado para os festexos con motivo do día das letras galegas!

Á volta, contarémosvos a nosa aventura 😉

 

Comezamos este novo ano con novidades… a primeira: xa temos preparado un obradoiro de colares!

Atentos!

Lugar: Centro Cívico de Santa Cruz
Horario: Domingos 22.02 e 01.03. de 16:00 – 17:30 h
Grupos alumnos: 10 persoas como máximo (cada alumno debe aportar 3 bobinas de fío de torzal)
Prezo: 40 € para socios de Santaia e 45 € para non socios
Inscrición: ata o 15.02. os sábados no Centro Cívico (de 11:00 a 14:30 h)

Se tedes calqueira dúbida ou suxerencia xa sabedes que podedes localizarnos no Facebook e no email

Estade atentos… porque este será o primeiro de moitos 😉

Tras o éxito da 1ª comida anual do Grupo de Baile e Gaitas Santaia… comprácenos poder anunciar a 2ª edición!

Estades todos convidados: músicos, bailaríns, pandereteiras, percusionistas, amigos dos músicos, pais, irmáns, avós… a gran familia de Santaia ten que estar ó completo!

Cando? O sábado 17 de Xaneiro de 2014 ás 14:30h
Onde? No Hotel restaurante as Galeras
Canto? Hai un menú para adultos (25€) e un menú para os nenos ata 12 anos (10€)
Como inscribirse? No Centro Cívico (avisade a Isa) ou nas Torres, durante os ensaios de gaita (avisando a Fran). A data límite de inscripción é o 10 de Xaneiro!

Non podedes faltar! Será a comida do ano!

Avisade a todos os vosos familiares e amigos, e vinde a celebrar o comezo do ano con moita música, moito baile e sobre todo moita festa!

Vémonos ali!

Agora si que si… comezamos!Tras unhas pequenas vacacións… volvemos ós ensaios de gaita, pandeireta, percusión e baile. A partir deste venres voltamos con moita forza e moitas ganas de seguir aprendendo.

Como todos os cursos, este ano tamén haberá novidades, polo que botade unha ollada ós horarios e cargade as pilas para empezar o ano a tope!

Comezamos este ano con moitas gañas, moita ilusión e moita forza para seguir facendo o que nos gusta, e nos encantaría poder compartilo contigo. Se queres saber que facemos, cando ensaiamos e o ben que o pasamos, podes entrar na nosa canle de Youtube ou no nosa páxina de Facebook e estarás ó tanto de todo o que acontece en Santaia!

Se tedes calqueira dúbida ou suxerencia contactade con nós e intentaremos resolvela o antes posible.

Arrincamos!

Gaitas soando dende as 9 da mañá, foguetes cada 10 minutos, un pobo cheo de xente e o Grupo de baile e gaitas Santaia ó completo bailando e tocando celebrando as Festas de Santa Cruz! Como cada ano, o cuarto domingo de Agosto é para nós o día máis importante das festas. A panificadora de Santa Cruz elabora un “ramo” con forma de tarta xigante que acompañamos en procesión á Igrexa de Santa Eulalia de Liáns. Antigamente representaba a fertilidade dos campos e un bo ano de labranza e colleita. Despois da misa do seu propio nome, a misa do Ramo, unha familia leva para á súa casa este gran biscoito, para compartilo con todo o mundo.

E que facemos nós? Asegurarnos de que todo o pobo se entere do que está a acontecer: cuartetos de gaiteiros percorren o pobo dende moi cedo espertando a todos os dormilóns coas alboradas; centos de foguetes soan sen parar antes e despois da misa; e antes de que todos vaiamos a comer bailamos e tocamos na que para nós é, unha das actuacións máis especiais do ano. O entorno é inmellorable e a compañía de todo o público de veciños ó noso carón indescriptible.

Que mellor forma de despedirse do verán que a ritmo de muiñeira?

En breves, atoparedes no noso Facebook e na galería de imaxes todas as fotos do Domingo do Ramo 2014.
Así que xa sabedes, o ano que ven, o cuarto domingo de Agosto, poñede as vosas mellores galas e esperámosvos en Lians 😉

Non podíamos deixar pasar o tempo sen agradecer a todo ó mundo a súa participación na II Foliada de Santaia! O tempo non estivo da nosa parte, coma sempre, os contratempos acumuláronse a última hora… pero finalmente, co traballo de todos saiu adiante unha gran festa, que de seguro todos recordaremos.

A tarde de actuacións estivo representada por Mieres, Vila de Cruces e Santa Cruz; unha sintonía perfecta de música e baile que fixeron gozar a todo o público presente. Moitas grazas á asociación Punteirolo e ó grupo L’Artusu por compartir este día con nós. Esperamos que fora igual de satisfactorio do que foi para toda a familia de Santaia.

Para animar a Praza de Esther Pita, e a todos os que non se animaron a bailar e subir a tocar ó escenario, había varios Stands que se sumaron á festa: Elena Ferro, cos seus zocos de todo tipo de tamaño, forma e cor; A Falchoca, cunha variadedade incrible de prendas para completar o traxe tradicional, e para o deleite de todos os paseantes; Mar, de Imende, mostrando o seu bo facer e o arte da confección; e as palilleiras e tecedoras de Santa Cruz, que non quixeron perderse esta velada. Moitas grazas pola vosa colaboración e participación, e moitas grazas a todos os que fixéchedes unha parada no Stand de Santaia para mercar un CD ou unha camiseta, contribuindo así coa nosa asociación.

Gracias tamén á gran familia de Santaia que fixo posible que, un ano máis, a Foliada saira adiante: ó equipo chourizo, ós homes máis apañados de Oleiros coa auga e luz, ós coordinadores de zona, ó equipo do son, ós incansables profes, ás mamás, que están para todo e saben de todo, ós bailadores e animadores, ás pandereteiras e ós gaiteiros, á presentadora, ós improvisados camareiros, ós nenos das rifas, ás preparadoras de cestas…gracias por continuar apostando e colaborando con Santaia!

Recordade que tanto na nosa páxina de Facebook, como na sección multimedia da nosa Web podedes ver as fotos da Foliada.

Vémonos na terceira ? 😉

Tras o éxito da primera Foliada… comprácenos convidarvos a todos á II FOLIADA de SANTAIA! O día 19 de Xullo a partir das 19:00h na praza Esther Pita, en Santa Cruz, para celebrar o día da Patria da Galega da mellor forma posible: bailando e desfrutando todos xuntos de boa música.

A partir das 19:00 h contaremos coa actuación do grupo folclórico de baile L’Artusu, dende Mieres; a asociación cultural Punteirolo, de Vila de Cruces; e o grupo de baile e gaitas Santaia.

Tras a quenda de actuacións daremos paso á FOLIADA LIBRE (a partir das 21:00h) á que convidamos a todo o mundo a participar e acompañarnos para facer deste evento unha festa inesquecible! Estade moi atentos á nosa páxina de Facebook, porque nos vindeiros días confirmaremos os grupos asistentes 😉

E non vai ser todo bailar e tocar. Todos os que vos acheguedes á Foliada poderedes probar os primeiros bocadillos de chourizo da tempada, preparados coma sempre da man das mellores cociñeiras. O bochinche estará preparado para dar de beber ás gorxas cansadas e no stand do Grupo de baile e gaitas encontraredes CDs e camisetas á venda para levar Santaia por todo o mundo. Tamén contaremos con pandeiretas, zocos e todo tipo de complementos para poder actualizar o vestiario de todos os bailadores, e que todo o que queira comece a bailar muiñeira!

E aínda non rematamos… durante toda a noite teremos á venda rifas a 1€ para poder participar no sorteo de incribles premios, colaborando desta forma coa Asociación de Veciños Santaia de Santa Cruz!

Aínda non estades convencidos? Será a festa do verán! Esperámosvos en Santa Cruz 🙂

O próximo domingo día 22 de Xuño, ás 18:00 h, no Teatro Municipal As Torres de Santa Cruz, o noso escenario favorito, terá lugar a gran festa de fin de curso do grupo de Baile e Gaitas Santaia. Un broche de Ouro para un ano que deixa tras de si moitos ensaios e moitas horas de baile, gaita e percusión.

Unha actuación na que todos os compoñonentes do grupo amosarán o que aprenderon e melloraron neste curso que remata.

Convidamos a todas as persoas que o desexen a participar, de balde, neste evento que de seguro, non deixará a ninguén indiferente. Máis dunha hora de espectáculo onde percorreremos parte do territorio galego, dende Bembibre a Limiñoa, a través da nosa música e baile.

Imaxes das recollidas, fotos da época, mostras do vestiario tradicional… e moitas máis sorpresas agardan a todos os asistentes a esta gran festa do folclore Galego.

Unha actuación para todas as idades, ó igual que os máis de 50 compoñentes do grupo Santaia, que dende os 4 ós 60 anos traballan arreo por espallar o folclore tradicional galego.

Esperamos vervos a todos alí, con moitos folgos para aplaudir e desfrutar do que será o espectáculo do ano! ídesvolo perder?

Durante os días 12 e 13 de Abril unha gran representación do grupo partimos cara Mieres, Asturias para participar na festa da “Folixa na Primavera”. Separábannos tan só 300 km que pasaron voando entre risas, películas, algunha que outra canción e moi bo ambiente!

O día comezaba moi cedo, dende as 11 e media de mañá, e ata a hora de xantar, todos os grupos invitados amenizamos coa nosa música o tradicional espiche da Sidra. Toda unha mañá na que os asistentes puideron desfrutar da “Bolla” da Folixa e as primeiras botellas de Sidra.

Tanta música e baile abriunos o apetito, así que grazas á cortesía do grupo local Ruxidera degustamos un menú do máis asturiano.

Aínda que despois da comilona apetecía unha sesta… o día non facía máis que comenzar! Todos a peitearse, maquillarse, vestirse, afinar os instrumentos e marchar cara a praza Requexu. Comeza a actuación!

Compartimos escenario con “La Barbacana” do Bierzo, “Ruxidera” e “L’Artusu” de Mieres, e ata altas horas da noite percorrimos a cidade de Mieres dende a praza Requexu, a coñecida praza da Sidra, pasando por Carreño Miranda, para rematar no parque de Xovellanos.

A noite fíxose curta para recargar forzas, pero xa que estabamos por Asturias…aproveitamos para visitar Avilés. Un bonito paseo polo casco histórico da cidade, con guía incluida, coñecendo un pouco máis da cultura e tradicións asturianas. Houbo moitos que quixeron demostrar a súa maña escanciando sidra! Parecía moito máis sinxelo do que resultou, pero botamos unha risas.

A viaxe de volta estivo amenizada por pandereteiras e gaiteiros que non querían deixar que ninguén se durmira nin un minuto!

Unha vez máis, moitas grazas a todos pola vosa colaboración e gañas de pasalo ben!

Non vos perdades a reportaxe da fin de semana asturiana na nosa galería de fotos, ou páxina de Facebook.