A nosa historia: O grupo fundouse no ano 1982 no seo da Asociación de Veciños, da que tomou o seu nome, dentro dun marco de iniciativas culturais propostas polos propios veciños, co obxecto de recoller, manter e transmitir as antigas tradicións do noso pobo no eido musical e artístico. Dende a súa fundación, e ó longo de todo este tempo, participou nas “Xuntanzas Mariñanas”, dende a 3ª edición, ademais de diversos actos culturais celebrados na bisbarra coruñesa, e outros espallados por toda a xeografía galega, merecendo ser destacados nos nosos primeiros anos as seguintes citas:

– Actuacións nas celebracións das “LETRAS GALEGAS”, no noso concello e nos de Cabana, Monfero.
– Fogueiras de San Xoan na cidade da Coruña.
– Festas patronais da nosa localidade, María Pita na Coruña, Ares, Corcubión, Mazaricos e Rianxo.
– Romarías: Loreto (en Porto do Son), Val de Xestoso (en Monfero)…
– Trofeo “TERESA HERRERA” da Coruña, nas edicións de 1990 e 1991.
– No eido dos concursos, ós que somos pouco aficionados, participamos en varias das edicións do que organiza anualmente “XACARANDAINA”, acadando en 2018 o segundo premio na categoría C, de maiores de 17 anos, ademais de gañar a nosa compañeira Paula Barral o premio á mellor bailadora..
– O ano 1992 actuamos no recibimento do “FACHO OLÍMPICO” na súa chegada á praza de María Pita da Coruña. Tamén participamos como grupo invitado no “FESTIVAL INTERNACIONAL” DA VILA DE PEDROSO en Vilanova de Gaia – Porto (Portugal).

En 1994 foi o inicio da nosa proxección internacional, realizando intercambios culturais co devandito País irmán, entre os que destacamos os de: Rancho Rexional de Olival (1994), Tecedeiras do Areal de Santo Tirso (1995), Nosa Senhora dos Altos Ceus de Espiño (1995), Grupo de Danças e Cantares de Cortegaça (1997), Grupo Etnográfico de Freixo Ponte de Lima (1999)

No ano 2000 o lugar foi BRETAÑA, (FRANCIA), alí estivemos unha semana convidados pola BAGAD BOULVRIAG de Bourbriac.

Durante a nosa estadía na Bretaña, e máis en concreto dunha actuación espontánea na rúa, durante o festival de Loriént, fomos ollados polo organizador do festival CÉLTICA que se celebra a primeira semana de xullo de cada ano no Val Daosta, rexión autónoma do norte de Italia. Ademais, fomos invitados ao Festival Internacional de Châtelaillon Plage (Francia) en 2016, e ao Festival Folclórico de Oleiros, no distrito de Castelo Branco, en Portugal.

Seguindo coa nosa actividade tivemos a oportunidade de continuar percorrendo a Península Ibérica visitando diversos lugares:

– Braga (Portugal), ano 2002
– Vilanova de Gaia, Oporto (Portugal), ano 2004
– Miranda do Corvo, Coimbra (Portugal), no 2005
– Dos Hermanas (Sevilla), no ano 2005
– Vélez, Málaga (Málaga) no ano 2006
– Coimbra (Portugal) no ano 2009
– Mieres e Arriondas (Asturias) no ano 2011
– Vila Verde, Braga (Portugal ) no ano 2013
– Mieres (Asturias) no ano 2014
– Fuenlabrada (Madrid), no ano 2015
– Santander (Cantabria), no ano 2017
– Santander (Cantabria), no ano 2018

Todo isto ademais da nosa presencia en diversos pobos e celebracións ao longo da xeografía galega.

Merece especial mención a celebración do XXV ANIVERSARIO DO GRUPO SANTAIA (1982-2007) no Parque Luis Seoane de Santa Cruz coa presencia de compoñentes actuais e históricos.

Toda a nosa productiva actividade logrouse a través da escola permanente de música e danzas tradicionais que vimos mantendo dende a fundación do grupo. Nela aprenden as nosas tradicións unha media de cincuenta alumnos de todas as idades.

Na actualidade, corresponde a dirección musical a Alexandre Ruiz Vázquez e Francisco Longueira Pan, sendo Mar Cancela e José Luís Vázquez Rosales os que se encargan da danza e pandeireta.

Se queredes coñecer a nosa historia premede neste video e, da man dos compoñentes de Santaia, descubriredes os nosos inicios!