No verán, Santaia non ten parada!

Moito gozamos este verán, levando a música e o baile tradicionais de Galicia alí onde quixeron compartila con nós. Arrincamos no mes de maio achegándonos á Romaría do cole de Santa Cruz, CEIP Isidro Parga Pondal, a onde levamos as pezas que estivemos todo o ano preparando, nunha actuación que foi a primeira para algúns dos nosos músicos e bailadores.

A continuación, atrevémonos cunha pequena ousadía. Presentámonos ao XXXVIII Concurso de Baile Tradicional Xacarandaina, ao que nos achegamos con dous obxectivos fundamentais: deixar unha boa imaxe de Santaia e gozar dun escenario como o Palacio da Ópera de A Coruña, que impón e che crece a partes iguais. É de salientar que conseguimos os dous obxectivos pero, ademais, levamos a enorme sorpresa de acadar o segundo premio da categoría C e a nosa compañeira Paula Barral levou a casa o galardón ben merecido de Mellor Bailadora. Deixámosvos o vídeo desa actuación, á que levamos a Xota de Santa Sabiña, que non cansamos de rever.

Co pulo que nos deu este arranque de tempada, centrámonos entón na preparación do espectáculo etnográfico “Romeiros”, unha proposta na que o público nos acompañou nun percorrido por algunhas das principais romarías de Galicia e que transcorreu entre finais do século XIX e os anos 20. Nel, non só presentamos música e baile, senón que o fixemos enmarcándoas na vida cotiá da Galicia daquel tempo.

A partir de aquí, xullo foi un mes intenso. O día 14 visitamos Bueu para participar no Festival Retrouso, antes de celebrar o día da Patria en casa, na praza Esther Pita, de Santa Cruz, cun festival de música e danza no que nos acompañaron o grupo Faragullas de Teixeiro e o Rancho Folclórico e Etnográfico de Oleiros (Castelo Branco – Portugal). Sen tempo para máis, preparamos a equipaxe para volver a Santander, convidados pola Casa de Galicia por segundo ano consecutivo para celebrar con eles o 25 de xullo. A acollida foi, coma o ano anterior, inmellorable.

Pouco despois, tivemos a oportunidade de ir tocar e bailar a unha voda que se celebrou no magnífico pazo de Xaz. O son das nosas gaitas recibiron aos recén casados e aos convidados, boa parte deles de orixe escocés, coma o noivo, que gozaron coa proposta de música e baile que lles levamos.

Xa en agosto, devolvemos a visita á Agrupación Faragullas de Teixeiro, que celebraba nesa localidade a XVIII Semana da Cultura e do Lecer, antes de poñer o peche á tempada coa nosa cita grande: as festas de Santa Cruz, coa procesión do Carme, as alboradas e, por suposto, o Ramo, que se celebrou, coma sempre no adro da igrexa de Liáns. Pero isto non foi todo, entre unha e outra data, os nosos gaiteiros participaron en foliadas, alboradas e pasarrúas, levando a súa música, a súa alegría e o seu saber por tódolos recunchos da nos terra, que no verán non temos parada!

Toca, gaiteiro, toca
Toca se queres tocare
Que están agardando as nenas
Que elas queren bailare

Seguir lendo “No verán, Santaia non ten parada!”

Advertisements

Obradoiro de construción de pandeiros

Entre os nosos propósitos para o novo ano está o de avanzar na apredizaxe no eido da música e o baile tradicional. Por iso, decidimos plantexar unha serie de obradoiros que nos permitan reforzar ou ampliar os coñecementos dos integrantes de Santaia e dos amigos que os queiran compartir connosco.

Para empezar, temos planificado un obradoiro de construción de pandeiros, que será impartido polo artesán Xosé Maceda, toda unha autoridade nesta materia. Será o día 27 de xaneiro e terá un prezo de 70 € para os socios e 75 € para os non socios. Neste importe está incluído todo o material necesario para a construción do voso propio pandeiro cadrado de 38 x 38 cm, que levaredes a casa xa listiño para empezar a tocar. Quen se apunta?

Cartel Pandeiros_Xan18

 

Boas Festas e Feliz Aninovo!

Estamos ás portas dun novo ano e toca facer balance do que remata e proxectos para o que comeza. O punto final ao 2017 puxémolo hai uns días, coma sempre, na residencia de maiores de Oleiros, onde xa nos sentimos coma na casa, cun público agradecido que nos recibe con enorme agarimo. Que máis se pode pedir?

Mirando cara atrás, dámonos conta de que fixemos un montón de cousas este ano. Do que máis orgullosos estamos é do Casamento de Ramón e Palmira, un espectáculo etnográfico de música e baile que nos pon o listón moi alto para o ano que vén.

Tamén viaxamos a Oleiros, no distrito de Castelo Branco, en Portugal, onde compartimos unha fin de semana marabillosa cos amigos do Rancho Folclórico e Etnográfico de Oleiros, que nos devolverán a visita o vindeiro verán. Polo demais, percorremos a xeografía galega, tocando e bailando en foliadas, romarías e festas patronais, ademais de poñer música e baile a máis dunha voda.

Ao 2018 non lle pedimos moito máis, nin moito menos! Seguiremos tocando, bailando e cantando para recuperar, conservar e difundir a nosa cultura e tradición. E, por suposto, compartindo esta tarefa con tantos outros compañeiros e agrupacións, enriquecéndonos os uns aos outros.

21167343_1414024575384845_7607619045702061934_o

Seguimos en contacto en 2018, para o que vos trasladamos os nosos mellores desexos.

Boas Festas e Feliz Aninovo!